Адзін беларус замежжа — адзін еўра для Украіны

Беларуска-ўкраінскі валанцёрскі цэнтр «Сустрэча» запускае агульны збор дапамогі для Украіны.

Давайце пакажам, колькі нас — беларусаў, якім не ўсё роўна і якія хочуць дапамагчы Украіне.

Ідэя вельмі простая: адзін беларус замежжа — адзін еўра.

Не дзесяць, не сто, не тысяча. Проста адзін.

А калі вы хочаце, можаце дадаць яшчэ па адным еўра за кожнага члена сваёй сям’і, роднага ці блізкага чалавека, які жыве ў Беларусі, падтрымлівае Украіну, але сёння не можа далучыцца да гэтага збору сам.

Адзін еўра — адзін чалавек.

Адна маленькая магчымасць сказаць:

«Я ёсць. Я не стаю ўбаку. Мне не ўсё роўна. Я з Украінай».

Бо гэты збор не толькі пра грошы. Ён пра людзей.

Мы раз’ехаліся па розных краінах і гарадах. У кожнага сваё жыццё, праца, сям’я, свае праблемы. Мы розныя. Але ёсць тое, што мы можам зрабіць разам.

Давайце не словамі, а справай пакажам, колькі нас.

10 000 € — значыць, нас 10 000.

100 000 € — значыць, нас 100 000.

І калі частка гэтых еўра будзе пералічана за тых, хто сёння застаецца ў Беларусі, — яны таксама стануць часткай нашага агульнага голасу.

Магчыма, нам проста трэба сабрацца.

Па адным еўра.

І самім убачыць, колькі нас.

Сабраныя сродкі пойдуць на дапамогу вайсковым і цывільным ва Украіне. Пасля завяршэння збору будзе апублікаваная поўная справаздача аб выкарыстанні сродкаў.

У мэтах бяспекі ахвяраванні прымаюцца толькі з картак беларусаў, якія знаходзяцца за мяжой.

Нас шмат. Давайце пакажам, колькі!

Адзін беларус — адзін еўра для Украіны!